Punu thin-langno

Angthin kalangno ta esi angkang do kalima don atum?Nepunu Bongtelong aphan theklong te nephusi kaheno thuji jo lapu ho.Tangka kachinghon abidi thekthe ong Sabun lata pe kechok asabun nemthu,kenamji ke aphi alam lo Teron hem apang kachi-eh ahem adung aplingplam athe si kaita kachonghu dam lapu jo.Lasi phu,pe ri ta chechok eji.An kechota ha inglong arlok pen kevan phingnu aloh along,tovar damvoi ta ha akeng ahom eh konthuvang na pu amat nangcheplok thujok.Sita dei punu Bongtelong asomar lapen pinu bang ke chingki mepik pik ho.

Arnisi nelita hithi dunpen chevang ahut punu Bongtelong aphan tovar long pene pherai mir theklonglok si neli arju lo—–
“Oi ko punu pi chonghoi si nangke tovar le phrai mirlo?”
Jo arju longle tanglo. Non ekhep ase pathe oh si arju thulo.
“Punu pisi pherai mir mati?”
Hang ase pathe oh ajok neliphan nangmeng et si lapen aning ke oi pen nangthaklo—-
“Nang pinu tiko laso er aleh ave ave Dettol ebong namduntha pu amat vangbom ahut chainong aloh jon ni kachetong mat abong klo dundaklo”
“Pholo pini ke nangta” neli ning arlo matha joi lo.
“Abongso boko punu?” puthot neli arju thulo.
“Ador do oh tiko.Tangka lank lutchok lo pini ke.Ning jangje ong” Aning oipoi lapen amek hini sirip sirip son si theklong lo punu Bongtelong aphan.Bai arni le keso.Chainong tong ketur ponphit lone pine pomat luthong.Neli ta kajinso ta kajinso lo.Puthot pene ehi arimunso chitumling pherai mir theklong si neli arju thulo—
“Phuk ke phuk loko punu pisi pherai thumir lang ?”
Aning cherot kut son lapen ingnek hing si punu Bongtelong nangthaklo—-
“Ei ko la an ador keso ahormu kopusi akejoi loplot poma ? Lasi klodak abong achet pen neri munso cherotdutsi chihi kanglap ji pulo jo. Ador keso pen pene mesen ale pado nangji mati.”
Bai ko punu Bongtelong kardom… nangson le do oh te non pirthe kaboche monit la an sungse det ji.

📖DN Kiri Phangcho (Gajen),Gohpur